അനുഭങ്ങളുടെ അഗ്നിയും പേറി ഒരാൾ

അനുഭവങ്ങളുടെ അഗ്നിയും പേറി ഒരാള്‍

* Posted by sivasankaran on April 27, 2011 at 6:30am
* Send Message View sivasankaran's blog



ശ്രദ്ധിയ്ക്കാറുണ്ട് ഞാന്‍ ഇയാളെ.

ഇയാളുടെ ആശയലോകത്തെ.



വീട്ടുകാലവും നാട്ടുകാലവും വിട്ടകന്നു

മറുകരപറ്റി അഷ്ടിയ്ക്കലയുമ്പോള്‍

ജീവിതത്തിന്റെ അടുപ്പില്‍
വേവിച്ചെടുക്കാനാവുക നമ്മളെത്തന്നെയാണ്.
നമ്മിലെ കുതിപ്പുകളെയും കിതപ്പുകളെയുമാണ്.

കിനാവെട്ടത്തു കരിഞ്ഞുതീരുന്ന

നേരങ്ങളെയാണ്.

ഇനിയും കാത്തിരിയ്ക്കാനാവാത്തവിധം

പറന്നകന്ന പ്രതീക്ഷകളെയാണ് .




സ്വപ്നം വറ്റിത്തീരുംനേരത്ത്

ഉണങ്ങിപ്പൊടിഞ്ഞുള്ള ഒരു മടക്കനേരമുണ്ടാവും,

ഈ ഊഷരജീവികള്‍ക്കെല്ലാം.
ഒന്നിനുമാവാത്തകാലത്ത്

സര്‍വ്വതും മൂടിയടഞ്ഞ ഒരു മിണ്ടാക്കാലം.

ഇതാണ് ഓരോ അക്കരക്കാരനും

ശേഷിച്ചിടുന്ന ബാക്കിപത്രം.



ഒരു ജന്മത്തിന്റെ ചോരയും നീരും

പൊള്ളുന്ന ഭൂമിയില്‍ ഹോമം ചെയ്ത്

പ്രതീക്ഷയുടെ പച്ചപ്പും സ്നേഹവും

കാണാദൂരത്തു സൂക്ഷിച്ച്

തിരിച്ചെത്തുംസമയത്ത്

അവഗണനയുടെയും അവമതിയുടെയും

ഇരകളായി

ദ്രവിച്ചുതീരും

ഈ ഇരുകാലികളില്‍ ഏറെപ്പേരും.

എല്ലാമാവുമെന്ന മോഹത്തില്‍

ഒന്നുമല്ലാതാവുന്നതിന്റെ തുല്യംചാര്‍ത്തല്‍.
അറിയില്ല

എനിയ്ക്കീ കൂട്ടുകാരന്റെ ഹൃദയഭാഷ്യം.




ദീപ്താനുഭവങ്ങളുടെ അകത്തളം

സങ്കീര്‍ണ്ണാവേശങ്ങളില്‍

മുങ്ങിക്കുളിയ്ക്കുമ്പോഴും

കാരുണ്യത്തിന്റെ വേദം സ്ഫുടംചെയ്ത്

ചാലിച്ച് തരുന്ന ഒരു തരം ജന്മം.




ഷംസൂ...

നിങ്ങള്‍ ഏറെ മാറ്റംകൊണ്ടവനാണ്.

മദിച്ചാടുന്ന വിഷക്കാളകള്‍ക്കിടയിലും

തന്റെ സ്ഥായിവിശേഷം കൊണ്ട്
തുള്ളിച്ചാടുന്ന പുള്ളിമാന്‍ കിടാവിനെപ്പോലെ

ഏതു രാവുരുക്കത്തിലും

മതിമറക്കാതെ

മന്ദസ്മിതംതൂവി

കനിവ് തീര്‍ക്കുന്ന മാനവികത

താങ്കള്‍ക്കുണ്ട്.




നല്ല ചിന്ത.. സഹോദരസ്നേഹം..വായനാനുഭവം...

ആരെയും
വേദനിപ്പിയ്ക്കാനറിയാത്ത മനസ്സ്..

നാട്ടുമണം കൊണ്ട് തുടുത്ത നന്മ...





എല്ലാം ബോധിച്ചെടുത്തിരിയ്ക്കുന്നു, ഞാന്‍.




പ്രിയ സഹോദരാ...


"അലിവുള്ളൊ
രുള്ളുള്ളൊരാള്‍ക്ക്
നിത്യവും
അമരത്വജാതക
ക്കുറിയെന്നറിയുക.....!"


---------------------------------------------------

*ഷംസുദ്ദീന്‍ പെരുംബട്ട എന്ന സുഹൃത്ത്.

( ഇത് മലയാളികളൂടെ സോഷ്യൽ സൈറ്റായ കൂട്ടത്തിൽ ചിന്തകനും കഥാക്ര്തുമായ ശ്രീ ശിവ ശങ്കരൻ സാർ എഴുതിയതാണു.)